السياسة الخارجية

حصري ظهور قاتل بالزاويه

عبد الرحمن خالد عبدالبر شهيد النخوه والرجوله بيدافع عن اخته وقتل

#حصري

شهيد_الرجولة .. امبارح قتل المدافع عن شرف اخته،، بمنطقة الزاوية الحمراء

كتبت :إيمان ربيع 
عبدالرحمن خالد عبدالبر شهيد النخوة و الرجولة زى البنا بالظبط لكن اللى تم التحرش بيها وقرر يدافع عنها ويجيب حقها كانت اخت عبدالرحمن
اللى حصل ان اخت عبدالرحمن خارجة تجيب الفطار لأهلها ففى سواق توكتوك ( مجرم 15 سنة ) مع اصحابه خلاها ماشية وشدها من طرحتها ووقعها ع الأرض و اتحرش بيها غير طبعا المتحرشين أصدقاء السوء
فرجعت البيت بتبكى واستنجدت بأخوها عبدالرحمن الشهم فقالها “سيبى الموضوع دا عليا وانا هحله ” فخدها ووصلها لمدرستها نتيجة خوفها علشان مفيش حد يتعرض ليها وعلشان تكون مطمئنة
قرر عبدالرحمن يسلك طريق الاحترام مع اشخاص لا تعرف للاحترام معنى وقرر يروح للمجرم يعاتبه ويكلمه بكل ذوق مع ناس متعرفش الذوق خصوصا انهم شبه جيران لكن للاسف المتحرش سبه وشتمه ولعنه وكان فى مشدات بينهم فقرر الأب ( ابو عبدالرحمن ) يتدخل علشان متحصلش مشكلة فقابل ابو المجرم عسى انه لما يعرف فيربيه و ميأذيش بنات أخرى ويجيب حق بنته الصغيرة
لكن المفاجئة ان ابو المتحرش بلطجى زى ابنه فقاله ” براحتنا ونعمل اللى عايزينه واعلى ما ف خيلكم اركبوه وابننا محترم غصب عن اى حد ”
ومنتهاش الموضوع لحد كده .. عبدالرحمن راح محل شغله اللى هو جنب بيته وفى منطقته فأبو المجرم و اخوه و عمه و المجرم ( العصابة الرباعية ) راحوا ليه المحل علشان يأدبوه و يربوه فأبو المجرم بيقول لابنه المجرم ” لو كلمك نص كلمة اقتله ✋” فالمجرم ما صدق وأثناء المشادة مع عبدالرحمن فى محل اكل عيشه جرى المجرم ع بيته واخد منه سكينة واستغل ان عبدالرحمن مش واخد باله وقام ” ضاربه 3 طعنات بالسكينة واحدة فى ظهره و التانية فى دراعه والأخيرة فى قلبه اللى اودت بحياته فورا ”
ولما حاول يهرب بعدها الاهالى مسكوه و بلغوا الشرطة اللى جت لكن عبدالرحمن كان ودع الدنيا فى ثوانى ودمه مغرق محل اكل عيشه .. وهو حاليا قدام النيابة
عبدالرحمن اتقتل علشان قرر يدافع عن اخته زى ما البنا قرر يساعد بنت بتتعرض لانتهاك فى الشارع وفى النهاية 2 ابطال اتقتلوا غدر
و للاسف مش هيتحاكم المجرمين محاكمة عادلة “من قتل يقتل” لانهم اقل من 18 سنةً 😔
يعنى شابين صالحين يموتوا ويغادروا الحياة لكن اتنين مجرمين عايشين بينا ويكونوا بعد سنوات احرار طلقاء ينتهكوا اى بنت زى ما هما عايزين
واقعة عبدالرحمن لازم يتحاكم فيها ابوه وأخوه و عمه اللى شجعوا مجرم انه يكون مجرم بزيادة ويكون عنده التحرش و القتل سهل جدا
لازم يوسف المجرم (15 سنة ) يتعدم زى ما القضاء ف عهد مبارك فى ال 2000 اجل محاكمة طفل مكملش 18 سنة لانه اغتصب وقتل لحد ما تم السن و اتعدم .. لو مكنش فى واقفة دلوقتى و منظمات المجتمع المدنى تتدخل ولو متعدمش يوسف المجرم وبقى زى راجح حر طليق كونوا متأكدين ان فى غضون أسابيع هيظهر ” بنا وعبدالرحمن ” جداد
للأسف موت الشهيد عبدالرحمن كل المجتمع مشارك فيه لاننا للاسف مجتمع مازلنا بنبرر التحرش وندافع عن المتحرش ونلوم الضحية لحد ما اصبح المتحرش مجرم وبجح وبيقتل اللى بيقوله انت غلط لانه أتعود من المجتمع الكبير انه يشجعه فلما يلاقى شخص او اتنين ضده فطبيعى يخلص منهم بسهولة لكن لو المجتمع ككل رفض التحرش و المتحرشين معتقدش ف #متحرش منهم هيكون موجود بينا
#شيروا و #اتكلموا عن عبدالرحمن .. اتكلموا عن شهيد الرجولة لان الإعلام الق*ذر بتاعنا مش هيتكلم عنه لانهم متعودوش يكونوا منصفين ولا يناقشوا القضايا الهامة فقط يناقشوا كل ما هو تافه مثلهم ✋
طالبوا بإعدام يوسف .. طالبوا برجوع حق البنت و اخوها اللى استشهد عشان يجيب حقها .. طالبوا بحق كل بنت اتعرضت لتحرش و المجتمع اعمى وأصم و ابكم

#الاعدام_ليوسف_حق_عبدالرحمن_فين
#شهيد_الرجوله

الوسوم
إغلاق
إغلاق