نصائح من ذهب للصديق اللى خلّص ثانوية عامة .. لو جبت مجموع مدخّلكش الكلية الا ترضيك . أو أهلك عايزينها ، وعندك حالة عامة من الاحباط والاكتئاب والشعور ان مستقبلك كله ضاع

خالد علم

الصديق اللى خلّص ثانوية عامة ..

لو جبت مجموع مدخّلكش الكلية اللي انت أو أهلك عايزينها ، وعندك حالة عامة من الاحباط والاكتئاب والشعور ان مستقبلك كله ضاع ، وانك هتعيش فقيـر أو في منزلة اجتماعية متدنّية .. مش صحيح ..

لو جبت مجموع دخّلك الكلية اللي انت / أهلك عايزينها ، وعندك حالة عامة من السعادة والتفاؤل والشعور ان مستقبل عظيم في انتظارك ، وانك هتشتغل بمرتب خرافي أو تعيش في منزلة اجتماعية عالية .. برضو مش صحيح ..

دخلت الكلية X اللي بتحبها / أو دخلت الكلية Y اللي مش بتحبها ، ونجحت فيهم .. وفي نفس الوقت فتحت لنفسك طريق تعليم موازي يؤهلك لمتطلبات السوق فعلاً ، البرمجة والتصميم والذكاء الصناعي والماشين ليرنينج ، وغيرها من كل المتطلبات بتاعت العصر .. وطوّرت اللي تقدر تطوّره من سكيلز ..

وقتها فقط ، تقدر تقول انه ” ممكن ” يكون طريقك أفضل وأسهل ..

لكن دا لا يعني أيضاً انك هتعيش حياة سعيدة أو تعيسة..

مفهوم السعادة والتعاسة المستقبلي دا مش حقيقي .. مجرد وهم كبير.. ملايين مرّوا بالمرحلة دي وعندهم أمل عظيم في بكرة بسبب اجتهادهم ، فأصابهم امراض ومشاكل ومتاعب وأزمات جعلت حيـاتهم قطعة من الجحيم الأبدي ..

وملايين مرّوا بمرحلة الثانوية العامة وهم متحطمين تماماً ، فكان في انتظـارهم مستقبل مليان فلوس ورفاهية وابداعات وهدوء نفسي لم يتوقعوا ربعه لاحقاً ..

متخليش حد يخدعك .. لا اللى بيمدحك عشان مجموعك كبير يخدعك .. ولا اللى بيتهمك بالتقصير أو ينظرلك بإحتقار عشان مجموعك متواضع ، يخدعك ..

في الحالتين ، لازم تشتغل على نفسك الفترة المقبلة .. وفي الحالتين ايضاً ، الموضوع كله لا علاقة له بالسعادة المستقبلية من قريب او من بعيد..مع تمنياتنا بالتوفيق والنجاح للجميع والف مبروك.

b28b6c07-160a-4ba8-8ff5-b009439d849d.jp
إغلاق
إغلاق