وسيط اليوم

جريدة الكترونية عربية

مصر لم تغيب عن مونديال قطر ٢٠٢٢

مصر لم تغيب عن مونديال قطر ٢٠٢٢

كتبت منى فوزي

٢٠٢٢/١١/٢٠

شاب مصري اسمه “رام ماضي” سافر لـ قطر مش عشان بس يتفرج على مبارايات كأس العالم بس لكن كمان عنده هدف تاني أكبر وأهم.

 

“رام” قرر يلبس تيشرت مكتوب عليه Follow Me to Egypt ويلف بيه في كل شوارع العاصمة القطرية الدوحة طول أيام وفعاليات البطولة وفي التجمعات الجماهيرية عشان يلفت نظر الناس في الشوارع لزيارة مصر ولو حد منهم وقفه وسأله بيتكلم معاهم بمنتهى الصبر عن بلدنا عشان يشجعهم يزوروها.

 

وقال “رام” في حوار مع الصحفية “أمنية سعيد”: (أنا طبقت الفكرة دي قبل كدا في إسكندرية لكن المرة دي مختلفة عشان ده حدث دولي وبيشارك فيه وفود عالمية، وحاولت أختار جملة مختلفة عن الجمل التقليدية وكان قصدي بيها تعالى معايا مصر)..

 

الجميل في الموضوع إن “رام” تفاجأ ان ناس كتير من الجالية المصرية عايزين نفس الديزاين عشان يطبعوه هما كمان ويشاركوا معاه في المبادرة!.. كمان بيحاول يتواصل مع السفارة المصرية في قطر لإنه بيحلم الفكرة تبقى قانونية ويكون فيه جزء مخصص للترويج للسياحة المصرية خلال فعاليات كأس العالم من خلال QR Code والناس تعمله Scan مثلًا يوصلهم بأبرز المعالم عندنا أو أبرز عروض السفر والسياحة في مصر..

 

“رام” ناوي يروج للسياحة المصرية في المدرجات كمان زى ما عمل كده بره

وبيقول: (أنا معايا علم مصر كبير وناوي أحضر بيه جوة المدرجات في مباريات الفرق العربية)

 

صحيح مصر غابت عن المشاركة في كأس العالم وكنا كلنا بنحلم نكون في الحدث العالمي الكروي الأهم بس ورغم كده فيه تواجد مصري من نوع مختلف شارك فيه “رام” الشاب المصري الجميل اللي قرر يستغل الحدث عشان يروج للسياحة المصرية بدون ما حد يطلب منه ده لإن اللي كان بيحركه هو محبته لبلده فقط

Follow by Email
Instagram
Telegram
WhatsApp