ولاد الأصول …!!!…

بقلم: نيفين إبراهيم

وسيط اليوم

9/4/2025

لمن لا يعرف من هم ولاد الاصول
ولاد الأصول
يا بشر .. دي ناس نضيفه اوي.. نضفتها من جوه بتظهر برا مش بالفلوس خالص
ولاد الاصول هيعاملوك بنضافه ورقي حتي لو مش عاوزين منك حاجه
هيعاملوك حلو جدا حتي أن كانوا من درجه عاليه
زي ما القرءان قال
” ورفعنا بعضكم فوق بعض درجات “
هتحس معاهم انك من نفس درجاتهم نفس المستوي لأنهم ناس متربيه على الأصول ناس عارفين كويس معني كلمة ” جبر الخواطر “ولاد الاصول مش هيفرق معاهم ماركة عربيتك ولا هدومك ولا حتي عندك إيه
هيعاملوك حلو لشخصك ولأخلاقك معاهم
ولاد الاصول هيفترضوا إنك كويس وهيعاملوك بالإفتراض دا وإن ثبت العكس هيبعدوا مش هيعرفوا يبقوا حاجه تانيه
ولاد الاصول بيتصدموا في ناس كتير بس ميعرفوش يئذوا
ولاد الاصول هيلتمسولك أعذار ويدوك فرص كتيره لأنهم مش بيخسروا الناس بسهوله
ولاد الاصول في لحظة صدمة ممكن يفقدوا الأمل فيك
بس مش هيقدروا يخلوك تفقد الأمل فيهم
وفي عز زعلهم منك ولجأتلهم هيخدوا بايدك لبر الأمان
ولاد الاصول في عصرنا دا بقي أسمهم ” السذج ، الهبل ”
دا أسمهم في وسط زمن كله خداع ومظاهر كدابه
دا لأنهم عندهم سلام نفسي وأمل وحسن ظن بالله إن الخير موجود دايما في كل العصور وأنه اكيد هيغلب أي شر داخل النفوس المريضه
ولاد الاصول بقوا عمله نادره اوي عشان كده اللي يلاقيهم يحافظ عليهم لأنهم غاليين اوي
الانسانيه والمبادئ الطيبه مابتجزئش والبني ادم معدنه الحقيقي مش بيبان غير في الشده
احنا ممكن يكون حوالينا ناس بتقول انها بتحبنا خمس الالاف مره في الساعه بس في وقت الشده هما اول ناس يتخلوا عنك وممكن نكون مش قريبين من ناس بس في وقت الشده مابنلقيش غيرهم جنبنا
كلنا ولاد ناس.. بس مش كلنا ولاد أصول !!

ماتنخدعوش بالمظاهر ولا بالكلام الحلو ولا حتي بصله القرابه إلي بينكوا
الافعال هي وبس إللي جديره تثبتلك معادن الناس وغلاوتك في قلوبهم
عن ولاد الاصول اتحدث