انتظر الحلقه الاخيره لتسعد

كتبت تغريد نظيف

وسيط اليوم

٢٠٢٢/١١/١١

صديق بيحكي ويقول كنت في محافظة تانيه بزور صديق مريض

وتكلفه مواصلاتي لرجوع بيتي حوالي اربعين جنيه

وكان معايا في محفظتي اخر خمسين جنيه 

ركبت اول مواصله وبدفع الاجره اتفاجئت بصديق ماشوفتوش من خمس سنين

اصر يدفعلي الاجره

خدنا بعض بالاحضان واتكلمنا في امور الحياة لحد مانزلت

ولما نزلت علشان اركب تاني مواصله من الموقف

لقيت حد واقف بعربيته وبيزمرلي

ببص لقيته جاري اللي ساكن في الشقه اللي فوقيا

ركبت معاه وانا مذهول من الصدفه

 

جاري يدوب نزلني تحت البيت وسابني علشان يركن العربيه

لقيت زوجتي بتكلمني ان الدوا بتاعها خلص ومحتاجه منه ضروري

زعلت وبصيت لربنا في السماء بقوله يارب انت عالم ظروفي ، كنت اجلت موضوع الدوا كم يوم بس ، ده انا ممعيش غير يادوب خمسين جنيه

رحت الصيدلية اجيبه لقيت العلبه ب ٢٠٠ جنيه اربع شرايط

قولتله اديني شريط

جيبتهولها وانا بسأل نفسي

لو دفعت فلوس المواصلات كنت هاتصرف ازاي !

معقول يارب مرتب الاحداث بالشكل ده !

كده ايقنت انها مابقتش صدفه ، ده سيناريو الهي مكتوب بعنايه

 

رغم فرحتي ب اني جيبتلها الدوا 

الا اني بسأل نفسي ، بكره هناكل ايه واخر خمسين جنيه اتصرفت

مكملتش نص السلالم لقيت تليفوني بيرن ان الشغلانه اللي كنت هاعملها لحد من ٣ شهور واتلغت ، قرر يكملها وهايبعتلي الصبح اول عربون ليها

 

مراتي بتفتحلي الباب وبتقولي ” ايه ده ! انت بتعيط ليه !! “

 

مالقتش رد على لساني اقوله غير ده شريط الدوا ، وبكره هايجيلك العلبه كامله 

 

كل امور حياتنا سيناريو الهي 

وارد يحصل مواقف نحس ان السيناريو درامي وحزين

لكن دايما الحلقه الاخيره بتكون نهاية اي الم ووجع

انتظر الحلقه الاخيره في كل موقف تمر بيه 

اكيد هاتبكي من الفرحه اكتر من البكا اللي بكيته من صدمة الاحداث 

 

ربنا زي ماعارف ايه اللي جاي عارف كمان ايه اللي معاك

هايدبرها بشكل لا تتوقعه وهاتبهرك الاحداث