علموا أولادكم في كل صباح

كتبت تغريد نظيف

وسيط اليوم

٢٠٢٢/١١/١٨

علمو اولادكم أول مايصحو من النوم يقولو صباح الخير بأنكم تقولولهم صباح الفل … صباح الورد … صباح الجمال على وردتي ..

 أجمل صباح على ابني ونور عيني. . واسألوهم نمتو كويس؟ 

 

علموهم أول مايصحو يقولو الحمد لله ان عندهم يوم جديد يعيشوه..

فهموهم أنهم محظوظين وفي نعمة أنهم صحيو لقو كل حاجة زي ماهي.

 

علموهم لما يصحو يصبحو على بعض.. الاخوات يبتسمو في وش بعض ويقولو صباح الخير. 

 

فهموهم أن ربنا دلوقتي بيوزع الأرزاق وخلوهم يدعوه بأي حاجة يتمنوها حتى لو كانت أن حصة الماث تتلغي

 

علموهم اول مايصحو يشربو ميه مهم تكون الميه أول حاجة تدخل جسمهم الصبح و علموهم ماينزلوش البيت من غير فطار . 

 

علموهم يبوسوكم وهما نازلين ويقولوكم يومك جميل أو

 have a good day

بأنكم تقولولهم انتو اتبسطو انهاردة، اليوم هيبقى جميل باذن الله

 

علموهم يحصنو نفسهم ب بسم الله الذي لا يضر مع اسمه شيء في الأرض ولا في السماء وهو السميع العليم واستودعوهم المولى.

 

علموهم لما يرجعو يسألوكو زي مابتسألوهم يومكم كان عامل ايه؟ عملتي ايه انهاردة ياماما؟ شغلك كان عامل ازاي انهاردة يابابا؟

 اطلبو منهم ده بوضوح بالوقت هيتعودو ان الاهتمام يكون متبادل.. اعينو أولادكم على بركم.. 

 

لما يرجعو اطلبو منهم يقولو احلى ٣ حاجات حصلت ف اليوم حتى لو هيقعدو ساعة يفكرو.. انتو كده بتعلموهم يبصو ع الحلو ويركزو فيه.. اسألوهم ليه دول احلي تلات حاجات .. خلوهم يتكلمو عن مشاعرهم واسمعو وابتسمو