نخلة مريم
بقلم أمل فرج

جريدة وسيط اليوم

وجالى الجرح أولته
وعلمى ده .. مالوش تأويل
فروع النخل يا مريم
بتنشف ليه ؟
وليه تنشف وقلبي يميل
صلبتوا البدر من نوره
وآياته بقت تراتيل
بتوجع فى القلوب ذكرى
وبنسلّم لا نتكلّم
وفرحى قليل
وبنشوفه فـ قلب اليم مش طايله
مع انه فـ قرب الخطوة
بيدوسك
وبيقطّع معاه الشرايين
يا أهل السحر
مات موسي
وكل المعجزات ماتت
ولا شايفه ونس فيها
وضلاّيه على رمشى
وكحلة ليلى ناسيها
وبدّلها دما فـ وشى
بعتله فى الجواب شوقى
ملايكة للسما شايلاه
نوارس صوتها بات اشواك
ورافضه تدندن اللهفه
فما تلومشى
على غلطه بتغلطها
دا يوسف مات .. ولا عادشى
يأوّل حلم من تانى
وجرحى فيّه بيعلّّم
فما تقولشي على حلمك
يبان خجلان يقول ساكت
فيا عاشق لكل سكات
سكاتك غش فى قلبى
ولا ظاهر
ومات قلبى و كان طاهر
واهى مريم كمان ماتت
فمات النخل بعديها
وجف العرْش …