الغلط الاكبر فى الحسابات بقلم الشاعرة  دعاء النمر

الغلط الاكبر فى الحسابات

بقلم الشاعرة  دعاء النمر

بتخَبطَّ كل الناس فيا
وأنا عادي، ومسَلم ليهم
جوايا حاجات بتقول: يمكن
العيب كان فيا ومش فيهم!
أقسمت برب الكون إني
كل اللي اديتهم من قلبي
خلصت دقاتي على إديهم
مع ذلك عمري مَا لمُت الغير
وبقول: ده فراقهم يمكن خير
قربنا كتير، يمكن أزيد
من شيء متنافر نسبيا
قربنا برغم الاحتمالات
قد تحيا حاجات
وتموت بسببها حاجات تانية
أنا عمري ما فكرت لثانية
إيه ممكن يحصل لو خطيت؟
كان لازم بالوقت احسبها
لو حاجة وجودها بيقتلنا
الأفضل -دلوقت- نسيبها
الغلط الأكبر في الحسابات
بنقلبّ ونراجع فيها
وبنعزل روحنا فقلب خانات
بعد الأيام ما بترميها
بنراجع إيه، وبنحسب إيه؟
أيامنا وعدت وعاشوها
بنفتحَّ للناس مشاويرنا
بيكملوا فيها ويمشوها
وبنسرد لله تفاصيلنا
والآخر نحلف: غَشوُّها!
مش بقصد أسرد في الحكايات
لو كنت أقصد
كات أولى حاجات أذكر فيها
عن ناس أخدتنا بذنب الغير!
أو عن جناحات حرموها تطير!
عن رفض لفكرة
“نبقى بديل”!
أكتر حكايات بتجَرحَّنْا
هي اللي بتكشف في المستور
هي اللي بتخرج دون تفكير
هي اللي بتوصل للجمهور
الغلط الأكبر في الحسابات
بنفارق ناس ونحنلهم
الغلط ان احنا اللي بننداس!
ونتوه ف الذكرى وأماكنهم
مسكينة الروح مش بتفرقَّ
من كتر الغدر محَسَبتهَِّْاش
الدنيا دي دايرة ومبتهداش
بتكمل سيرها بدون تفكير
لا بيفرق حد ف يوم عاشها
أو مرة اتأخر ولا مجاش!
الغلط الأكبر ف الحسابات
بنحط الكل ف الاختبارات
بنحدد للأشخاص سيرهم
الغلط الأكبر ف الحسابات
بندِّْفَعَّ ناس فواتير غيرهم!