النور براح
والضلمة ضيق
والحق مجذوب في الطريق

تاهت خطاه
تاهت معاه
احلامنا و العمر البرييء

كل الملامح بقت سراب
كل الندوب
تشبه لصوت الغراب

وقت الغروب
ممنوع تصاحب الشط الغريق
مخدوع من البحر والناس والصديق

كل القلوب صارت خراب
الحلم دايما شيء مباح

والصبر خايف يبتدي تاني الصباح

وأنا مش معاند للبراح
انا بس نفسي اطلق سراح

كل الأماني المؤمنة
كل الدموع المسجونين
كل عشاق السلام
كل رواد الحنين

النور براح
والضلمة ضيق
والعمر واقف في الممر
جوة المضيق

جوايا نور وسنين سماح
على كتفي مزروع السلاح
فوق راسي كل اولاد البراح

دلوقت
مين اللي هينجي الغريق

مين فيكم قادر
يطفي في يوم الحريق
سؤال وخايف من الاجابة
محال وممنوع من الوصول

شبه الدموع ساعة النزول
تنزل براح
تنزل في ضيق

About The Author