مع وسيط اليوم:  اعرفي كيف تعودي  طفلك  علي خلع البامبرز 

كتبت/ تغريد نظيف

وسيط اليوم

٢٠٢٢/٦/٤ 

الافضل تبدئي في الصيف 

لا تتاخري و قبل ان يصل عمره سنة و نصف

بشرط لازم الطفل يكون بيمشي لوحده وإدراكه كويس 

ودايماً البامبرز يكون جاف أكتر من ساعتين وده معناه أنه بدأ يقلل من معدل التبول.

 

حاولي ان لا تقارنيه  بطفل غيره، كل طفل وله إمكاناته، 

وكمان مش كله بيحتاج بوتي، ممكن يقعد على التوليت على طول وممكن لا 

فرغي نفسك أسبوعين و اعطي وقتك للمهمة دي.يعني مستعدة جسدياً ونفسياً، مفيش امتحانات ولا مشاكل في الشغل أو على ولادة مثلا.

 

اخلعي الحفاض طوال اليوم (يعني يلبسه وقت الخروج أو النوم بس) . 

 

ويلبس هدوم سهلة الفك بدون أزرار. والافضل  لو يختار غياراته الداخلية الجديدة بنفسه ويحس أنه كبير 

 

كل ساعة لساعتين قعديه في الحمام أو علي البوتي من خمس لعشر دقائق، خصوصاً بعد ما يصحى من النوم وبعد الوجبات. 

 

كلميه كتير في الموضوع ده حتى لو كلامه قليل أو مش بيتكلم ، هيفهم 

 

شجعيه كل ما يقعد في الحمام حتى لو ما معملش حاجة ،صقفي له و غني له 

 

هو لسة بيتعلم ،طبيعي يبقى فيه خساير و هدوم بتتوسخ و أرض بتتملي بي بي 

 

بلاش ضرب أو زعيق أو شدة وطولي بالك كتييييير  

 

 راقبي حركاته زي أنه يستخبى أو يجلس القرفصاء أو يمسك في أعضاؤه دي علامات معناها يللا جري على البوتي 

 

استخدمي طريقة المحاكاة أو التمثيل، خلي لعبته المفضلة تقعد في الحمام و شجعيها هيتأثر 

 

هيفضل كام مرة يغلط في التقدير و يعمل عملته بعد ما يقوم من الحمام بدقائق 

 

لما يحقق التارجت و يعمل المراد في الحمام احتفلي معاه و حسسيه بالإنجاز .

 

كتري عدد المشجعين له، باباه و إخواته 

 

لو بيخاف من الحمام، هاتيله سلم أو قاعدة صغيرة وستيكرات ملونة تكسر رهبته 

 

أقل من سنة و نصف في أمهات نجحت بس مش شرط كل التجارب تكون زي بعض.وعلى فكرة ده نجاح وهمي في الغالب  

 

لو نجحتي في خلع الحفاض بالنهار حليتي ٩٠٪ من المشكلة. 

 

لحد ٥ سنين مقبول يبل سريره بالليل، بعد كده اكشفي

 

قللي سوايل و فواكه بالليل و ما تنيميهوش زعلان 

 

عوديه يدخل الحمام مباشرة قبل ما ينام. 

 

مع الوقت علميه الخصوصية في خلع ملابسه و دخول الحمام و علميه النضافة بعد الحمام 

 

اتعبي شوية في الأول هترتاحي كتير 

 

همسة في أذن الأب؛ لو سمحت اوعى تزعل مراتك في المرحلة دي و تقبل كل شيء منها و إلا قوم أنت بالمهمة دي يا بطل.

 

الانتكاس وارد جدا وده ممكن يحصل لمدة أسبوع ولا حاجة مش عاوزك تحبطي أو تزهقي ده بيحصل وهيرجع تاني كويس 

 

لو فشلتي لمدة أسبوعين كاملين 

مفيش مشكلة، شهرين كده وجربي تاني، الدنيا مخلصتش .(والتكرار يعلم الشطار)