حاجات لو عملتيها هتعملي عزومه من غير تعب

كتبت تغريد نظيف

وسيط اليوم

٢٠٢٢/٩/١٦

١- اعملي السلطات من بالليل وغلفيها باسترتش 

٢- لو في نوع سلطه بيحتاج انك تحطي صوص عليه حطيه قبل التقديم علشان السلطه متدبلش

٣- اعملي العصائر من بالليل ومتنسيش تجهزي مكعبات ثلج 

٤- جهزي سفرتك ورصي الكوسترز و اطباق الاكل ورصي المعالق والشوك🍴 والسكاكين🍽 

٥- اغسلي البقدونس ونشفيه وقطعيه واحفظيه في كيس في الثلاجه علشان قبل تقديم الاكل توزعيه علي طول في طبق التقديم

٦- لو هتعملي صنف فيه بشاميل اعمليه من بالليل عادي وغلفيه باسترتش وقبل التسويه بساعتين طلعيه من الثلاجه وبعدين دخليه الفرن

٧- تبلي اللحوم قبل العزومه ب٢٤ ساعه علي الأقل

٨- حمري لسان العصفور واحفظيه في علبه في الثلاجه وقبل العزومه حطيه في حله وانزلي بالشوربه

٩- لو بتكوني مرتبكه وبتخافي اللحوم متستويش كويس استخدمي أكياس حراري علشان تضمني سواها