زراعه العنب فوق سطح البيت

كتبت تغريد نظيف

وسيط اليوم

٢٠٢٢/١٠/٤

1- هنقلل درجة الحرارة على سطح المنزل 7 درجة مئويه عن الحرارة العادية لاننا هنمنع سقوط اشعة الشمس بطريقة مباشرة على البيت وهنا بنتكلم على الصيف خلى بالكم يا جماعة

2- زراعة واحد متر مربع مساحة خضراء يكفى احتياجات الفرد من الاكسجين طوال العام 

3- هيعطى ظل وحماية لخصوصية السطح يعنى ممكن نطلع احنا واولادنا عادى جدا وتقعدو من غير ماحد يتطفل على الخصوصية بتاعتكم من من منزل آخر خاصة لو عملنا سياج اشجار فاكهة على سور السطح 🙂 

4- هناكل احلى وافضل عنب اورجانيك بدون اى كيماويات 

5- وهناكل ورق عنب بردو

الطريقة ازاى ؟

 هنجيب برميل بلاسيتك ونعمل فيه فتحات من اسفل علشان يصرف الماء الزائد من الزراعة 

نحضر الطمى الزراعى أو الطين من اى ارض زراعية + الرمل بتاع المبانى بعد غسيلة من الاملاح ونخلى النص رمل والنص طمى و نخلطهم مع بعض كويس 

 نجيب حوالى 4 كيلو فضلات طيور وحمام أو فضلات الاغنام والابقار أو كمبوست علشان دا السماد العضوى اللى هيغذى النبات 

 نخلط كله مع بعضة ونضعه فى البرميل 

 هنشترى شتلة عنب من اى مشتل فاكهة 

او من وزارة الزراعة او المشاتل التابعة لمديريات الزراعة  

 هنجيب الشتله ونحفر حفره فى البرميل ونشيل الكيس المغلف لشتلة العنب ونوضع الشتله برفق فى قلب البرميل ونردم عليها بالتربة مرة أخرى  

 نرويها مرتين فى الصباح الباكر وفى اوخر النهار فى الصيف وكل يومين مرة بالنسبة لفصل الشتاء 

وبكدا يبقى عندنا شجرة عنب لما تكبر هنعمل ليها تكعيبه اللى هيا السلك المشدود على اعمده بطول السطح علشان العنب بيفرش نفسه عليها زى المنظر المفرح اللى فى الصورة