مختار حسين شخصية رياضية إستثنائية

كتبت تغريد نظيف

وسيط اليوم

٢٠٢٢/١٠/٢٨

اثناء تصوير مشهد فى فيلم “لهاليبو” فوجئ المخرج حسين فوزى بالممثل مختار حسين بيشيل حسن كامل بإيد واحدة ويجرى بيه..

المشهد عفوى وكوميدى وغير مسبوق، عجب المخرج فقرر إضافته للفيلم.

الإضافة منطقية لان اساس دخول مختار حسين عالم السينما مع الأخوة لاما فى فيلم “معجزة الحب” هو استثمار شهرته العالمية كبطل لرفع الأثقال وإظهار قوته الحقيقية على الشاشة، ومهما كان وزن حسن كامل أثناء تصوير المشهد مش هيجى حاجة جنب الأوزان اللى كان بيرفعها مختار.

مختار حسين شخصية رياضية إستثنائية..

أول بطولة القطر المصرى فى رفع الأثقال سنة 27، وثانى بطولة العالم “ميونخ” سنة 30، وأول بطولة العالم “لكسمبورج” سنة 31، ودرب منتخبات وأندية مصر والسويد والدنمارك ولبنان.

وايه اللى يخص مشهد فيلم لهاليبو؟

فى بطولة العالم 1931 اللى أقيمت فى لكسمبورج كان فى منافسة بين الأبطال على رفع الحديد بإيد واحدة “اليمين”.. مختار حسين نجح فى رفع وزن “110 كيلو” بالإيد اليمين، وده رقم قياسى عالمى.

فشل أبطال العالم فى ضرب الرقم لمدة 5 سنين، وبعد خمس سنين تم إلغاء المنافسة بالرفع بإيد واحدة لخطورة الرفع على أجسام اللاعبين، وظل الرقم العالمى يحمل إسم اللاعب المصرى “مختار حسين”.

مختار هو النموذج الأمثل لطفل كان بيعانى من “فرط حركة” فيها عنف وتمرد ومشاغبة وإستعداد فطرى لدخول عالم الإجرام ولشاب هذبته الرياضة وعدلت من سلوكه وخلقت منه بطل عالم، ويشيل زميله ويجرى بيه قدام الشاشة.

.