16 نصيحة من نصايح الحياة اليومية 

كتبت تغريد نظيف

وسيط اليوم

٢٠٢٢/١٠/٣١

ولادك مش زي بعض .. شخصياتهم مختلفة .. صفاتهم مختلفة .. اشكالهم مختلفة

 وقفي أي مقارنة وعاملي كل واحد باللي يناسب وضعه 

 كل بيت لازم يكون فيه خناق .. سواء بين الاخوات وبعض .. او بينك وبين زوجك .. او بينك وبين حماتك

 تقبلي المشاكل والخناقات لانها جزء أساسي في الحياة 

الكون مش ضدك .. والعالم مش بيكرهك وحظك ليس سيئ

 تفكيرك تجاه نفسك هو اللي سلبي !! 

 لازم فيه طبخات وحلويات تبوظ منك ..ولازم فيه حجات هتنسيها .. ولازم فيه مسؤوليات هتقصّري فيها

 خففي على نفسك إنتي مجرد بشر مش إنسان آلي !! 

سينتهي اليوم ولن تنتهي ابدا من انهاء كل مهام البيت والاولاد والتمارين والواجبات

متقلقيش فيه يوم تاني تخلصي فيه الباقي !! 

 لازم هيكون عندك طفل عنيد .. معروفة يعني !!

 متصغّريش عقلك قدامه .. ولاتعملي عقلك بعقله .. ده مجرد طفل !! 

 فيه مشاكل تقدري تحلّيها .. وفيه مشاكل متقدريش عليها 

 تجاهلي وتأقلمي مع المشاكل التانيه عشان ترتاحي وتهدي !! 

 الكوباية وقعت والسجاد اتبهدل والشقة كركبت .. مش مهم 

 المهم ولادك بخير وعندهم صحة يلعبوا ويبهدلوا .. ضحكتهم بالدنيا 

 المواعين في الحوض مش هتنتهي والبيت عمره ما هيفضل مترتب !!

بالراحة على صحتك شوية 

 مش كل ماتزعلي تروحي على المطبخ تاكلي أي حاجه قدامك 

 فيه حاجه اسمها رياضة او تغني او تاخدي شاور او تلعبي مع ولادك .. ركزي عشان تعرفي تخسي 

 تعبانه .. عندك برد .. بطنك وجعاكي .. زورك ملتهب

 في اختراع اسمه راحه في السرير .. وغدا اسمه تونة وجبنة !! 

 مش كل مشكلة مع زوجك تحزني وتكتئبي وتبكي وتوقفي حياتك عشان يصالحك 

 مارسي حياتك بشكل طبيعي ياحبيبتي .. لانه غالبا هيكون ولا على باله خصامك اصلا 

 زعيقك وشخطك وصراخك من العيال مش هيحل مشاكلهم

👈صوتك بس اللي هيتغير ويبقى صوت راجل جمهوري !! 

حافظي على احبالك الصوتية 

 حطي كحل او كريم وحطي برفان 

متنسيش نفسك وسط طاحونة الحياة عشان متتحوليش لعم عبده البواب

من غير سبب هتحسي انك مخنوقة وقرفانه واعصابك تعبانه 

 وقتها سيبي الموبايل من إيدك وابعديه عنك لأن الموبايل بيثير اعصابك من غير ماتحسي !

 بتفكري في اللي فات والمآسي القديمة والاحداث الطاحنة 

خدي نَفَس عميق واستعيذي بالله من الشيطان الرجيم وبطلي نكد .. ركزي في الحاضر