نصائح لمطبخك

كتبت تغريد نظيف

وسيط اليوم

٢٠٢٢/١١/١

لما يكون عندك وصفه فيها تحمير بصل وتوم نزلي البصل الاول عشان التوم سهل يتحرق بسرعه 

دايما زودي مع الزبده شويه زيت اثناء الطبخ عشان الزبده ممكن تتحرق

سخني الفرن قبل خبز الكيك بعشر دقايق ولما تستوي اقفلي النار وسيبي الكيكه جوه الفرن والباب موارب عشان درجه حرارتها تهدأ تدريجيا ومتهبطش

دايما استخدمي دقيق متعدد الاستخدامات للكيك عشان يبقي هش ولونه فاتح 

متطبخيش اللحمه وهى مجمده …خليها تفك شويه وبعد كده سويها براحتك 

دايما خلي اللحوم والفراخ تستوي على نار هاديه عشان تطلع دايبه ولو فيها اى صوص يكون مركز 

جربي تزودي على السلطه بشر ليمون او برتقال هتخلي طعمها مميز جدا

انقعي البطاطس قبل القلي او الطبخ فى ميه وملح عشان متسودش

زودي ملح وسكر على بصل السلطه عشان يضيع اى ريحه فى الفم بعد الاكل

زودى على المعجنات زبادي او لبن بودره هيخليها هشه زى القطن

لو عايزه تبشري اى نوع جبنه ادهني المبشره شويه زيت هيسهل ليكي البشر بطريقه سريعه جدااا 

عشان تسرعي سوا اللحمه زودي نواه تمر مش هتأثر على الطعم نهائي وهتخلي اللحمه دايبه دوب

الرز يتشوح الاول فى زيت ورشه ملح وفى نص السوا شيلي الغطا وختي الزبده او السمنه بالمعلقه على وش الرز …هتلاقي ريحه ونتيجه روووعه فى الطعم 

رشه سكر على اى تسبيكه طماطم بتعادل حموضه الطماطم وتخليها خفيفه على القلب

المعجنات لازم تدخل فرن سخن ومجرد ماترفع وتتنفخ يبقي قلبها استوا وتابعيها عشان متتحرقش

لسهوله تحمير الشعريه ولسان العصفور للتخزين …اقليهم فى زيت سخن وغزير وطلعيهم بالمصفاه

و الكوكيز او البسكوت بقي طري …سخني الفرن عشر دقايق واقفليه ودخلي الكوكيز عشر دقايق كدا بتمني الرطوبة وينشف ويطلع مقرمش.