بطاطس محمرة بدون زيت

كتبت تغريد نظيف

وسيط اليوم

25/7/2023

نظرا لارتفاع سعر الزيت ياريت تتعلموا ماتحمروش بطاطس تاني بالطريقة القديمة اللي هي غمر البطاطس بالزيت
وإعملوها كده هتوفروا معاكم زيت اللي (سعره ٦٥ جنيه)
وكمان طعمها أحلى بكتير من البطاطس المحمرة العادية

الطريقة يا حلوين كالتالي
١. بتقطعي البطاطس بحجم وسط وتحطيها في مية وملح ومعلقة خل بتعمل قرمشة جامدة
٢. وبعدين تتسلق في ميه لمدة ٤ دقايق بس
٣. وبعدين تفرمي توم وبابريكا وملح وفلفل وكمون وكمان زعتر لو عندك وتقلبي فيهم البطاطس
٤. وبعدين معلقتين كبار زيت ع البطاطس وتقلبيهم
٥. وبعدين في الفرن تحت الشواية وتسبيها تتحمر لمدة ١٠ دقايق بس
والنتيجة عن تجربة : أقسم بالله ريحتها بتقلب الدنيا
ريحة الثوم مع البطاطس ولون البابريكا بيكون خطير جدا ولو جربتوها هتعجبك إنتي وعيالك
وكلنا عارفين أن الكبار قبل العيال بتعشق البطاطس المحمرة

ده طبعا غير إنها صحية جدا جدا بزيت قليل لاننا كلنا عارفين أضرار الزيوت المهدرجة علي الصحة