الضاحك المرعب
كتبت تغريد نظيف
وسيط اليوم
20/9/2023
الفنان عدلي كاسب ذو الشخصيه المنفرده القدير في التمثيل
فلو شوفته فى فيلم “ام العروسة” هتضحك … ولو شفته فى فيلم “هجرة الرسول” أو “السفيرة عزيزة” هتخاف وتترعب.. وده اكبر دليل انه كان ممثل بجد ويقدر يعمل كل الادوار.. ويمكن علشان كده سموه صاحب الالف وجه..
عدلى كاسب كان من الفنانين اللى حبوا الفن من صغرهم.. ومن الفنانين اللى عرفوا برضه اليتم من صغرهم لما ابوه مات وعمره 10 سنين..
فى الفترة دى وعلشان يتخطي أزمة اليتم بدأ عدلى يشغل نفسه فى فريق التمثيل فى المدرسة، وقدم معاهم أكتر من عرض كان اغلبها كوميدي .. ولما اكتشفوا خفة دمه بقوا يعملوا له ادوار مخصوص..
لما كبر عدلي دخل مدرسة الفنون والصنائع وبعد ما اتخرج منها بتفوق اشتغل مدرس هندسة لمدة 12 سنة ووصل بيه الحال أنه بقى وكيل وزارة بوزارة التربية والتعليم ومسؤل عن المسرح المدرسي ورائدا من رواد التربية المسرحية..
عم عدلى كان مركز فى شغله كمدرس وبيمارس التمثيل على استحياء لحد ما فتح معهد التمثيل فانضم له وساب الهندسة وركز اكتر فى الفن..
عم عدلى اشتغل فى مسرحيات كتير وافلام اكتر .. وكان بيحب اوي دوره فى فيلم لقاء فى الغروب.. بينما مكنش بيحب دور ابو جهل فى فيلم هجرة الرسول رغم براعته فيه.. لانه زى ما قال “راجل مؤمن ومُصلي ومكنش يحب اسمه يقترن بإسم عدو الإسلام”..
وعلى عكس فنانين كتير .. كان عم عدلى بيحب ينزل يمشى فى الشارع يقابل الناس ويسلم عليهم ويتكلم معاهم ويحكي.. وياخد منهم تفاصيل أدواره.. وكان بيبقى فى قمة سعادته لما حد يناديه بأسماء الأدوار اللى قدمها على اعتبار أنها سابت اثر مع الناس..
وعلى عكس فنانين كتير برضه.. عم عدلي ما اتبهدلش فى أخر ايامه.. وفضل شغال لاخر نفس.. حتى يوم وفاته كان لسه راجع من بروفة.. والحلو بقى انهم لما دخلوا عليه لقوه ميت وهو مبتسم وبيسمع قرآن..
المزيد من الموضوعات
الفنانة نهال عنبر خضعت لجراحة دقيقة بالكتف بالمنظار…
ايام العز على مسرح البالون غدا…
جنات لو اتجوزت…