البرنس جميل  راتب

كتبت تغريد نظيف 

وسيط اليوم

20/9/2023

في مثل هذا الشهر كانت النهاية لبرنس الفن فى مصر والمنطقة.. الفنان جميل راتب..

وقصته اتولد لعيلة ارستقراطية وأبوه كان كل مناه أن ابنه يشتغل زى باقى العيلة فى السلك الدبلوماسي، لكن جميل كان شايف انه لا ينتمى للعالم ده وكان حابب اكتر انه يفضل قريب من الطبقات اللى تحت.. اللى كان بيبقى معاهم على راحته بينما هو مع عائلته “خجول انطوائى”.

فى فترة دارسته الجامعية فى فرنسا، وبدل ما يركز فى دراسة الحقوق، ركز جميل راتب على انه ازاى يتعلم اصول الفن، لحد ما جه فى سنة من السنين وقرر أنه يسيب الحقوق ويركز فى الفن ويبقى ده طريقه ومستقبله..

وصل الخبر إلى العيلة، وحاولوا فى البداية أنهم يرجعوه لطريقهم لكنه رفض، فقطعوا عنه المصروف، على أمل أنه يتزنق ويرجع لهم، لكنه قاوم، واشتغل نادل وشيال وبياع خضار عشان يسدد مصارفيه، وفضل يتكعبل فى أزمات كتير، لحد ما الدنيا ضحكت له اخيرا وبدأ ياخد دور فى التانى فى التالت لحد ما وصلت أعماله فى فرنسا لسبعين عمل بين مسلسلات وأفلام.

فى مرة عمل جميل راتب حوار وسألته المذيعة عن الشخصية اللى يحب يقولها شكرا.. فرد وقال هما 3 شخصيات مش شخصية واحدة.. سواق أوتوبيس شافني في الزمالك، وقف الأوتوبيس ونزل يسلم

عليا… وعاملة نظافة في مطار القاهرة لم تجد ما يعبر عن إعجابها إلا إنها تعزمني على إزازة كوكا كولا.. وسواق تاكسی قلتله أنا ما عنديش أولاد فقاللى إحنا كلنا أولادك.. دول تلاتة أثروا فيا أوى ومش قادر أنساهم، وبشكرهم من كل قلبی.. 

قبل سنة على وفاته وفى لقاء تلفزيونى مع راغدة شلهوب فى برنامج “فحص شامل”، واللي كان اخر برنامج يظهر فيه، سألته : “مش خايف من الموت” فرد وقال : ” الموت بالنسبة لي راحة من مشاكل المرض وكبر السن.. أنا مش خايف من الموت ولكن خايف من العذا*ب .. لما أموت هحصل الناس اللي كانوا جنبي و بيحبوني وأرجو أنى أقابلهم في العالم التاني .. وكفاية عليا كده أنا عمري 90 سنة وحبيت الحياة اللي عيشتها .. لكن حياتي دلوقتي راضي بها الحمد الله”.

بعد اللقاء ده بفترة قصيرة فقد جميل راتب صوته، وده خلاه يبعد عن الكل، وفضل عايش فى بيته لحد ما مات.. وبعد ما مات جميل راتب انتشر كلام كتير على انه اتبرع بـ 18 مليون جنيه هى كل ثروته لمرضى السرطان، قبل ما يموت، لكن الحقيقة ان ده محصلش .. لانه ببساطة .. مكنش معاه المبلغ ده.