إبن الأصول هل أصبح عمله نادره في هذا الزمان…
بقلم::سمير مهنا
وسيط اليوم
15/5/2024
عشان لما تقول لحد : يا إبن الأصول .. توزن الكلمة وتخلي بالك .. ديه مش للتهزيق .. ديه للتمييز والرفعة في الزمن ده ..
لازم تعرف إنهم عملة نادرة .. واللي منهم في حياتك .. نعمة .. ومش اي نعمة
في حب ولاد الأصول ….
ونتكلم شوية عن ولاد الأصول اللي مبقناش بنقابلهم في حياتنا كتير ..
بتعرف إبن الأصول إزاي ؟؟
أنا أقولك .. إبن الأصول:
* عمره ما ينكر فضل حد بعد فضل ربنا عليه أو ينساه ..
* بيفضل باقي على العشرة لحد آخر لحظة وبيعمل كل اللي عليه وزيادة ..
* مبيردش الأذى بالأذى ..
* وقت الشدة لو احتجته لازم ح تلاقيه ويمكن من غير ما تطلب كمان ح تلاقيه قدامك ..
* بيساعد الكل من غير اي مصلحة تعود عليه ..
* إبن الأصول كرامته عنده رقم 1 ومستحيل هيقبل اي إهانة .. ونفسه عزيزة عليه فوق ما خيالك ممكن يوديك ..
* إبن الأصول بيعرف يعتذر .. لو غلطان مش بيستكبر .. يقول انا آسف وغلطت فعلاً وغلطه مبيكرروش ..
* إبن الأصول كلمته واحدة ، لما يقولك هعمل صدقه ..
* إبن الأصول ضميره من جواه ييتحكم فيه ومبيسلمش ودانه لحد ..
* إبن الأصول صاحب صاحبه جدا .. مستحيل يبيع صاحبه علشان مصلحته ..
* إبن الأصول جدع بالفطرة.. الطيبة ملازماه ..
* إبن الأصول ملوش في اللت والعجن وكتر الكلام وشغل الصغار..
* إبن الأصول بيعرف يعاتب مرة واتنين وثلاثة علشان مش من طبعه إنه يفرط في حد بسهولة .. بس لما بيفرط ربنا ما يوريك عمرك ما هتعرف ترجعه تاني ..
* إبن الأصول ملوش في اللف والدوران بيقولك في وشك اللي هو عايزه .. وإيه اللي ينفع وإيه اللي مينفعش ..
* إبن الأصول عزيز وله بدل العزيز عزيز واتنين .. مش زي غيره مالوش غالي ..
* إبن الأصول لو اتظلم عمره ما يظلم .. بيسيب ربنا يجيبله حقه ..
* إبن الأصول يصفى بسرعه لو لقاك شاري .. وينسي بسرعة لو لقاك بايع ..
٠ إبن الأصول لو طلبت منه مش ح يقول معنديش .. يقول إن شاء الله قرّيب ..
* إبن الأصول يحب الخير لغيره حتي لو مش هيطول من الخير دة حاجة .. ويفرحلك من قلبه بجد ..
* إبن الأصول عينه شبعانه عمره ما يبص في رزق غيره ولا يبص في حياة غيره ..
* إبن الأصول بيقدر ويحترم أبسط واقل حاجة حلوة بتعملها معاه ..
* إبن الأصول مبيعرفش يخون ولا يجرح ولا يستغل فرص ولا يستغل حد ..
* إبن الأصول كل ما ينجرح ينكشف المعدن الطيب جواه …
* إبن الأصول صاحب الكل ..
وبيتكلم كل اللغات .. البسيطة ولغة الصالونات !
* إبن الأصول ميعديش عليه واجب .. ويديلك حقك من غير ما تطلبه ..
* إبن الأصول عرف الخلق الطيب من معدنه ، قبل ما يعرفه من شيخ وقسيس …
* إبن الأصول يديلك اللي محتاجة عادي جدا .. ويطلع من جيبه لحد اخر قرش معاه .. مبيفكرش في نفسه وبس .. طبعه وأصله الكرم ..
* إبن الأصول ما يعايرش ومايعايبش..
* إبن الأصول له ذاكرة الفيل في فضائل الناس وذاكرة السمك في نواقصهم…
* إبن الأصول مهما كان ناجح أو عنده كتير .. أخلاقه غلباه .. ميعرفش يتغر علي خلق الله ..
* إبن الأصول بيسيبك لوحدك تعرف الفرق بينه وبين غيره ..
* إبن الأصول جواه رحمة وعدل .. ودايما بيحط نفسه مكان غيره ..
* إبن الأصول مش المشهور .. ولا اللي معاه فلوس بس .. ولا اللي راكب عربيات وساكن في أحلي الأماكن ..
لكنه اللي بيدي ، وهو محتاج إنه يقول “هات “!!
* إبن الأصول مش منصب ولا جاه ..
من الآخر
*إبن الأصول هو اللي بيعمل الأصول من غير ما يفكّر ولا يقول!!
المزيد من الموضوعات
“تغيير الأدوار: كيف تتطور مسؤوليات الرجل والمرأة اليوم؟”…
إلغاء العلوم الإنسانية: هل نحن مستعدون للتضحية بهويتنا الثقافية؟…
رئيس حزب مصر 2000: المستشار محمود فوزي كان علي قدر المسؤولية فى توليه الكثير من المناصب القياديه…