المسحراتي المطرب محمد فوزى

كتبت تغريد نظيف 

وسيط اليوم

20/9/2023

الفنان والمطرب محمد فوزي رحمه الله عليه له قصه مع اغنيه المسحراتي 

ففى ليلة من ليالى رمضان وهو راجع بيته وقف محمد فوزي قدام مسحراتى ماشى ينده على الناس بصوت حلو اوي ولا فى الاحلام .. يومها فكر فوزي انه يعمل لحن جديد يصحى بيه النايمين للسحور وفى نفس الوقت يدخل البهجة لنفوسهم..

طلع فوزي جري على شقته يدندن ويلحن لحد ما الوقت سرقه ونسي يتسحر.. بس قال مش مهم المهم ان اللحن يطلع..

الافيه ان لحن “مسحراتي” لما اتعرض فى الاذاعة بقى يجي لفوزي جوابات كتير تعبر له عن اعجابهم بالاغنية.. ومنها جواب جه جواه حواله ومعاه رسالة صاحبها بيقول “أرجو أن تقبل الحوالة الموجودة بمبلغ خمسة وعشرين قرشا قيمة ما كنت سأدفعه للمسحراتى الذى يمر بالحي.. أننى استعضت عنه بأغنيتك التى تذاع فى الراديو ساعة السحور وأنت أحق منه بهذا المبلغ”..

بينما اراد عدد اخر من المستمعين أن يقدموا لـ “المطرب المسحراتى” زى ما وصفوه ما اعتادوا تقديمه لمسحراتى الحي.. فانهالت على فوزي لفافات الكحك والغريبة والفطير والبلح الابريمي..