روسيا اوكرانيا بقلم عمر السمالوسي

إقرأ علشان تفهم كويس إرهاصات الحرب العالمية الثالثة
يوم 27 فبراير ، الرئيس فلاديمير بوتين أمر بوضع « قوة الردع النووي » الروسية في حالة التأهب القصوى وعنها ، والعالم إتقلب وبدأت الميديا العالمية تعزف على نغمة الحرب العالمية الثالثة وإنطلقت الأبواق الدعائية الغربية فى حملة جبارة لتشويه الرئيس بوتين ووصفه بكل ما يشين وشوية يقولك بيعمل زى هتلر وشوية يقولك ده مجرم حرب وفاضل حبة ويقولوا إنه بياكل العيال الصغيرة بالليل.

مبدئيآ كدة وعلشان تبقى الأمور واضحة فالحرب العالمية شغالة من 2011 ومعارك تكسير العظام بين النظام العالمى القديم ، ومحاولات تشكيل نظام علمى جديد كانت ومازالت على أشدها بقالها أكثر من 10 سنوات ما بين حروب بالوكالة ، وإسقاط وتدمير دول ، ومحاولات السيطرة على الأراضى والمحيطات ، وحرب إقتصادية طاحنة وحروب أوبئة

وساعات تظهر كدة حروب عسكرية حقيقية تطفوا على السطح ، وترجع تختفى بسرعة علشان تستمر الحرب ومعارك تكسير العظام من خلف الستار
نرجع تانى لأصل الخبر الرئيس بوتين أمر بوضع «قوة الردع النووي» الروسية في حالة التأهب القصوى

أولآ الخبر ده علشان تقرأه صح لازم تكون متابع الأحداث والتطورات بشكل كامل “لأن جان إيف لودريان” وزير خارجية فرنسا أطلق تصريح يوم 25 فبراير بيقول فيه إنه على بوتين أن يدرك أن حلف الأطلسى لديه أسلحة نووية يعنى قبل تصريحات بوتين بيومين وبالتالى ، فــ السياق الصح للى عمله بوتين هو رد فعل وليس فعل
ثانيآ هو الرئيس بوتين أمر بإيه بوضع «قوة الردع النووي» في حالة التأهب بوضع مين يا فندم «قوة الردع النووي» الردع يعنى إحنا هنا بنتكلم عن الردع فى حالة الهجوم عليه مش العكس و هى دى لعبة الإعلام الغربى إنه طول الوقت يفهمك عكس الواقع يفهمك الأحداث من خلال وجهة نظره هو فى شيطنة الطرف الأخر ، فى حين إنه يبقى هو الملاك الوديع المدافع عن الحق والعدل

طب لييه الرئيس بوتين عمل كدة !!!؟ لأنه فيه تحركات بدأت تحصل كدة على الأرض من جانب حلف الناتو ، فى محاولة لإشعار الروس بالخطر ورفع كارت التهديد لأمن روسيا نفسه وسيبك من الدعم الكوميدى لأوكرانيا ، واللى بياخد الشكل الإعلامى بأكثر مما يحدث على أرض الواقع لكن التحركات اللى بنتكلم عنها هى تحركات حقيقية
حلف الناتو بيعزز تواجده فى قواعده العسكرية فى دول البلطيق وهم إستونيا، ولاتفيا، وليتوانيا ، واللى بيقعوا فى أوروبا الشمالية على الساحل الشرقي لبحر البلطيق وكلهم أعضاء فى حلف شمال الأطلسي ولو بصيت على الخريطة ، هتلاقيهم أقرب للعاصمة الروسية من أوكرانيا

يعنى حلف الناتو عايز يقول لبوتين إحنا بنهددك فهمى نظمى رسمى وبالتالى كان لازم بوتين يأمر بوضع «قوة الردع النووي» في حالة التأهب القصوى فى رسالة للغرب لأ مش إنتوا اللى بتهددوا لكن انا كمان بــ أهددكم
طب إييه هى «قوة الردع النووي» الروسية !؟ بإختصارا كدة هى منظومة نووية صاروخية وجوية عابرة للقارات وأسلحة عالية الدقة بعيدة المدى قادرة على ضرب العواصم الأوروبية فى توقيت متزامن بحيث إنه يتم إصابة الأهداف كلها تقريبا فى وقت واحد

طب هو الكلام ده يطمئن وإلا يقلق لو إنت بتسأل عن الحرب الشاملة ، فالكلام ده مطمئن جداً لأن طرفى اللعبة عارفين كويس أوى ، إن أى حد هيتهور ويطلق أول صاروخ ، بعدها ماحدش هيبكى على حاجة ، وهنلاقى الصواريخ النووية بتفرقع فى الهوا فى كل حتة ولا بمب العيد حتي و دى النهاية اللى مافيش حد سواء مننا أو من طرفى الصراع عايز يوصل لها أبدآ

️هو مش احنا قولنالكم قبل كدة إن المعركة مش أوكرانيا خالص وإن اللى بيحصل فى أوكرانيا ده مش حرب لكنه عملية عسكرية هدفها الرئيسى هو منع إندلاع الحرب الشاملة
️لأنه مع فارق القدرات العسكرية فروسيا لو إستخدمت قوتها الضاربة بكل إمكانياتها و من غير نووى كانت هتقدر تحتل أوكرانيا بالكامل وتدخل العاصمة كييف على أقصى تقدير فى 3 أيام

️لكن اللى بيحصل من الروس ده عملية شد وجذب ولعب بالأعصاب لأنه خلاص سيطر على شرق أوكرانيا اللى إنضم له طواعية وهو ده المهم بالنسبة له
وتانى لو إنت مهتم أوى بالحرب الشاملة وقلقان من حدوثها فهتلاقى دولة زى باكستان بتتحدى العقوبات الغربية وبتعلن إنها هــ تستورد القمح والغاز من روسيا ودولة زى المجر ، بترفض عبور الأسلحة الأوروبية المتجهة لأوكرانيا من أراضيها أو مجالها الجوي والصين دخلت على الخط وبدأت تضرب تصريحات ، إن الغرب لازم يقعد مع بوتين ويديله تطمينات بعدم تهديد أمنه القومى

️يعنى فيه تكتلات بتتشكل وبتنتقل من خلف الستار إلى خشبة المسرح و ده بيخلى الطرفين وبالذات الطرف الغربى ، يفكر مليون مرة قبل الإقدام على أى حماقة و ده الجانب المشرق فى الموضوع

️اما الجانب المظلم بقى هو إستمرار الوضع الراهن لمدة طويلة ، وعملية الإستنزاف المتبادلة أيوة متبادلة إوعى تفتكر إن اللى بيحصل إستنزاف للروس بس لكنه إستنزاف بشكل أكبر للغرب ومش هيقدروا يتعايشوا معاه كتير لأن التضخم هيضرب كل مناحى الحياة والتكلفة هتكون مرعبة و مش هيقدروا يقفوا أمام شعوبهم لأن معظم الشعوب الأوروبية بإستثناء كام دولة تتعد على أصابع اليد الواحدة ، عايشين بالفعل فى وضع صعب وبالذات بعد أزمة وباء كورونا

️ويمكن هو ده سبب الحملة الإعلامية المسعورة ضد بوتين ، علشان يلقوا بالمشكلة والمسئولية كلها على أكتافه بإعتباره هو المسئول عن إشعال الحرب وبالتالى فيبقى هو السبب فى اللى بيحصل ده كله فى حين إن الراجل كان قاعد فى حاله ، وهم اللى راحوا ونكشوه زى ما قولنا قبل كدة فى محاولة لتطويقه وخنقه من كل الجهات بالإصرار على ضم أوكرانيا للإتحاد الأوروبى وحلف الناتو و هو أكيد ماكانش هيستنى لحد لما يلاقى الصواريخ الأميريكية بتضرب موسكو

️الأحداث بتتغير بين لحظة والثانية وكلنا مضرورين منها لكن لحد دلوقتى تكافؤ موازين القوى يخلينا نشعر إنه فيه أمل كبير ، إن اللى بيحصل ده هــ يبقى أزمة مؤقتة وتعدى أو خلينا نأمل ذلك
حفظ الله مصر برئيسها وجيشها وشعبها