ابوهم مات..

شعر / محمد سامي

وسيط اليوم

5/12/2022

ابوهم مات
وساب ولدين وبنوته
وست كبيره كانت كل يوم تجمع عيونهم بين 3 كلمات
تعالوا احكيلكوا حدوتة
سنان الديب بتاكل اي حد ضعيف
وضافر قطة الغابة مبيخوفش غير الفار
فاوعوا ف مره حد يقول عليكوا صغار
ابوكوا لما كان يفتح بيبان جلابيته ع الدنيا
عيونوا كات تزلزل بوابات الدار
ابوكوا كان جدع وشريف
وكان ميخافش غير من ربنا الجبار
فاوعوا ف مره حد يقول عليكوا صغار
زمان انا كنت اخيط جرح ابوكوا بضحكة فوق الخد
وكنت اعمل عيوني كتاب وقهوة ونشره وسيجارة
مكانش معايا يحتاج انه يعرف حد
وكان دايما يدلعني يا سحارة
يا جامعه عيوني جواكي انا فداكي
يا اطيب حب جوايا يا صاحبة ضحكتي الاولى
ابوكوا كان بيتعامل معايا بطيبة ورجولة
وكان بيحبكوا جدا
وحاسس انه مش هيكمل المشوار
فاوعوا ف مره حد يقول عليكوا صغار
ابوكوا كان مكبركوا
وسايب سمعته مسند يقويكوا
ابوكوا كان بيحميكوا بحب الناس لحد ما مات
ودلوقتي انا معاكوا بلم عيونكوا يا حبايبي ب 3 كلمات
لحد الليل ما يبقى يفوت
ويمكن لما يجي الصبح
ينادي عليا ابوكوا واموت
وتبقوا لوحدكوا لكن هتبقوا كبار
فاوعوا ف مره حد يقول عليكوا صغار