كورة فى كورة

قصيدة/للشاعر محمد الشرقاوى

وسيط اليوم

11/2/2023

كورة فى كورة الدنيا خلاص
لحست كل عقول الناس
بقت الشغل الشاغل ليهم
عايشين فيها بكل حماس
تمشي في شارع تلقى حوار
شارك فيه كل الأعمار
فيه الرأي مع الإصرار
حاجة غريبة ومالها أساس
كورة فى كورة الدنيا خلاص
لحست كل عقول الناس.

بعد الفوز بنشوف أفراح
وزينة ورقص في كل مكان
صاحب العقل أكيد مرتاح
أما الباقي حصل له جنان
اللي بياخد يومها أجازة
واللي بيضرب ناس بقزازة
ويعمل بدل الفرحة جنازة
وكله يهون علشان الكاس
كورة فى كورة الدنيا خلاص
لحست كل عقول الناس.

شوف جمهور القهوة وصوته
زي مظاهرة في كل ميدان
وادي حرامي بيسرق قوته
ولا بيحرك حتى لسان
انت يا شعب الظالم نفسك
ولا يوم تعرف فين مصلحتك
عيش في الهلس سنين وبراحتك
مهما خطر بيدق اجراس
كورة فى كورة الدنيا خلاص
لحست كل عقول الناس.

الله يساعدك يا فلسطين
ليك ربنا وخلاص يا عراق
فين أيام أمجاد حطين
لما الشعب العربي دا فاق
حطم كل حدود الخوف
قال مش أعيش ابدا مكتوف
نادى العالم بص وشوف
إحنا على الأمجاد حراس
كورة فى كورة الدنيا خلاص
لحست كل عقول الناس

وادي أطفال مدارسنا يا خال
تعرف لاعب أو فنان
لكن عمره ما كان ع البال
تحفظ آية من القرآن
تهنا خلاص وبقينا ضايعين
لما سمعنا عن الملايين
اللي بتملا جيوب لاعبين
من غير زرع ومن غير فاس
كورة فى كورة الدنيا خلاص
لحست كل عقول الناس

القصيدة من ديوان ( اعتراف )