دموع بلقيس للشاعرة دعاء النمر

دموع بلقيس

للشاعرة دعاء النمر

~1~

الله لو تعرف..
شر البلا ومعناه
هو اني اكونلك فرح
وانك تكون معناه
فوضت أمرى انا فيك
وعوضنا عند الله
~2~
تعرف فلان؟ أعرفه
عايز دليل يوصفه؟
من خيبتى جرحني
وقدرت مجرحهوش
أعرف فلان أصل انا..
عاشرته عشرين سنة
وطلعت معرفهوش
~ 3 ~
الراحة مش ف دموع
ولاطبطبة ومعلش
الضلع ده مخلوع..
سايب أثر ع الوش
~4~
القلب لو معدن
مكنش يتكسرّ
القلب ده من دم
ف طبيعي يتأثر
لهذا من فضلكم..
مش زايدة شيء عنكُّم
لا عندي قلب يمين
ولا زايدة فص بطُيِّن
ولا كنت انا جاية
من أرض غير أرضكم
~ 5 ~
الاشتياق مش ضعف
أو دعوة للتجريح
أو دفعة الدقات..
عكس اتجاه الريح
6~
قلبك ده يطلع إيه
لاجل انه يوم يتصان؟
قلبك بيبني اغصان..
ملفوفة عناقيدها
بتأمنوا ليه لأحضان..
تتهدوا على إيدها
~ 7 ~
كل البشر بايعين
ما فضلش منهم حد
بتحس نفسك مين..
وقت اما تقلب ضد؟
القسمة ع الاتنين..
دايما بتطرح بعُد

~8~
والله مش فارقة..
أيامي من غيركم
أنا يعني هنقص إيه؟
النقص كان منكم!
~ 9 ~
كان مين يقول إحساسنا يوم يتهان
أو حد ييجي.. يزود الطينة!
وحياة كتاب الله..
كل اللي اقول ده نجاة
كان هو أول حد ينهينا!
~ 10 ~
وجاني الحلم متأخر
ف ضميته في حالة حزن
نسيني الحب ف نسيته
وكان شقق ساعتها الحضن!
11~
ريأكشن..
روحك البهتانة ف الصورة..
بتضحك للخلايق زيف
عينيك نجاتيف
سنين محبوسة ف الماضي
مشاعرك ضيف..
بييجي ويمشي ع الفاضي!
~ 12 ~
لسه السنين قادرة..
توهمني بالأحلام
وانا لسه ب اطاوعها
مع إن انا ف طوعها
ما بجيش ف يوم قدام!
13~
وعشان القلب بيتعلق..
ف حبال العشق الدبلانة
أنا أكتر حد اما بيغرق
أحلامه بتطلع عطشانة
~ 14 ~
متعكروش دمنا
ولا تيجوا تحكولنا
هو احنا ساعة الوجع..
كان مين صلب طولنا؟
~ 15 ~
اللي انكسر أهو راح
وعوضنا في الجايين
عض الأيادى مباح
لو من بشر خاينين
16~
يا خلق ضميرها مش طيب
وقاتلاكو أوي الغيرة
ده سبحانه اما بتنموّا..
بتيجي الحلوة ع السيرة
~ 17 ~
البنت لما اتجردت روحها..
حست عيون الخلق كاشفينها
حاولت تغير لون فساتينها
يمكن تداري جرحها الشفاف..
البنت لما الحزن كونهّا
لمتّ همومها، وسكنتها غلاف
والله لو تعرف..
شر البال ومعناه
هو اني اكون لك فرح
وانك تكون معناه
فوضت أمرى انا فيك
وعوضنا عند الله