أنا في وادي…

شعر / محمد سامي

وسيط اليوم

14/12/2022

أنا في وادي
وهي وقلبها في وادي
بترسملي ورود في الحلم
تدوس ع الورد ومااشموش
تقول هنعيش في حب وسِلم
وهي بتبني ضدي جيوش
وبتغربني في بلادي
أنا في وادي
وهي في دنيا غير دنيتي
بتسقي الدمع في عيوني
وتشرب ضحكها بدمعتي
ولما عيونها ينسوني
تقول عادي
أنا في وادي
وهي إستحلت إني احتار
أحاول أعدي بسفينتي
في ثانية تغير التيار
أشوفها بلادي ومدينتي
تشوفني جحيم ومر ونار
بتدبحني بسكينتي
وتعمل نفسها بتنهار
وتتأخر على ميعادي
أنا في وادي
وهي وقلبها في وادي