بينك وبين الشط..

الشاعر/ محمد الشرقاوي

وسيط اليوم

25/12/2022

بينك وبين الشط
كام مليون سنة
والبحر عالي
والحيتان مجانين
والريح بتضرب
من جميع الأمكنة
والناس في حيرة
مين يكلم مين
والحبل دايب
قال تعبت خلاص
السهم في الشريان
من يوم ميلادي وغاص
يا خلق عندي سؤال
فين سورة الإخلاص
تطرح سنابل قمح
تمسح دموع ملايين
والبحر يبقى أمان
وتقرب الشطآن
والعدل يغرس أمل
ويعيش هنا عنوان
ينقذ سفينة الأمل
ويحرر الخايفين
بينك وبين الشط
كام مليون سنة
والبحر عالي
والحيتان مجانين

———————–

بينك وبين الشط
عزم وإرادة وعمل
قدام عينيك أمواج
والموجة زي الجبل
افهم يا عم وقوم
وكفاية لعب ونوم
كل السفاين سعت
رسمت طريق معلوم
والشط قرب لها
وكتب على سطرها
والمجد صار ملكها
وما عاد هناك محروم
جوه السفينة كنوز
تعرف تنادي الشط
وتفك أي رموز
وتعدي بينا الخط
الفقر ده مش قدر
ولا وعد ولا مكتوب
الفقر عجز وضرر
للواهم المسلوب
وانا بين جميع البشر
بعلن وصوتي حزين
بينك وبين الشط
كام مليون سنة
والبحر عالي
والحيتان مجانين