طارق شامخ يكتب ياللى بتعيب ع الزمن

ياللى بتعيب على الزمن

بقلم طارق شامخ

ياللي انت بتعيب ع الزمن
والدنيا مش عجباك
وبتقتل الطير في الوطن
والخير ماهوش جواك
ناكر جميل الكل
ع الناس تملي تقر
عسلك خلاص بقى مر
والشر آخره هلاك
ياللي إنت بتعيب ع الزمن
والدنيا مش عجباك

بتبيع حبايبك والتمن
الحقد جه حناك
وتملي بتشم العفن
صورتك فاكرها ملاك
عايش حياتك غل
الكل منك مل
بكره الايدين تتشل
تتمنى بس شفاك
ياللي انت بتعيب ع الزمن
والدنيا مش عجباك

إبليس وعايش ع الفتن
من غير ما يترجاك
بتغني وتصلي لوثن
وتقول لكفره فداك
غرقان في بحر الذل
طعم الكريز بقى خل
حتى الحرام هيهل
وهياخد اللي معاك
ياللي انت بتعيب ع الزمن
والدنيا مش عجباك

اعمل حساب أب إندفن
وأخوات حقوقها معاك
وبلاش عناد بكره الكفن
والقبر يبقى غطاك
وقت الحساب هيحل
حتى الحلال هيطل
يومها مفيش بقى حل
عملك .بيستناك
ياللي انت بتعيب ع الزمن
والدنيا مش عجباك